اختفي يا ليل فقري من قبالي وَعيي ما بقا يطيق الليالي وبعد ما كان رسمالي خمولي طلع فجري كسرلي "راسمالي" *** أنا ما خلقت حتّى عيش خامل خلقت رافق مراحل عمر كامل نزلت من ورشة الإيّام حامل معي ضدّ العبوديّي رسالي *** خلقت شاعر معي أفكار شتّى وسما شعري وعي عالحلّ شتّى وأنا جايي على هالكون حتّى إتمرّد عا حكم "الإرتجالي" *** أنا شاعر وتفكيري تسامى عن المدح المخصّص "للنشامى" خلقت ثوره من دموع اليتامى كفرت بالظّلم ، وكرهت العدالي *** كرهت العدل حيث العدل نادر وجودو ، وما إلو حقل وبيادر كفرت بالظّلم حيث الظّلم صادر على حقوق العبيد من "الموالي" *** عشقت مذهب مساواة الخليقه ودرب بين الخيالي والحقيقه وزرعت من الأمل أجمل حديقه وسجنت اليأس وقتلت الجهالي *** أنا تركت الهنا عشقت المصيبي تا أعرف عدوّي من حبيبي وأنا ما خلقت إقنع في نصيبي نصيبي الذلّ وطموحي المعالي *** كنت إمّي الفزع والضّعف بيّي نكرت أهلي ومعي حرّرت خيّي الضعف بيعود يستولي عليي إذا ما خلقت من ضعفي بسالي *** كنت من عازتي "للبيك"غنّي وكان الوهم مالك قسم منّي "التحرر" كشّح الأوهام عنّي ولبّسني الوعي بدلة كمالي *** يا شعّار "التّغزّل" في وطنّا اتبعو شاعر بفكرة شعب غنّا ولازم كل مقطع شعر منّا ينقل شعب من حالي لحالي *** تعو بتحقيق هالفكره نجاهد ونبني للشعر أرقى معاهد شبع فنّ المعنّى من "المشاهد" وقرفنا من "غزل شايف غزالي"
خليل روكز: شاعر الزجل اللبناني شاعر زجل لبناني من مواليد وادي الليمون، قضاء جزين، عام 1922.
يُعدّ من أهمّ روّاد الزجل اللبناني، حيث أغنى هذا الفنّ كتابةً وارتجالاً.
لُقّب بـ "شاعر الشعب" ...
