بعدك بفكري ولو كنت عنك بعيد
وكل ما بعدت عنك غرامي عم يزيد
ومهما يقولوا البعد والغربة جفا
لاتصدقي بعدو معي حبك جديد
وكل ماعليي ينشلح ليل الجفا
بسهر بربي بغربتي طفل الوفا
وببعت إلك حصة عيوني من الغفا
ودمعة حنين بكل بيت من القصيد
هديتك من عيوني الغفا تاتشبعي
نوم الهنا وأحلام خضرا تقشعي
حتى تشوفي بغفوتك حبك معي
ورسمك بإيد ومحرمة ذكرك بإيد
مالي سمير على النوى غير النوى
وذكريات بخاطري تقسم نوا
إنتي عا تلة برد وجليد وهوا
وقلبي بصحرا شوق أقوى من الوقيد
وبينك وبيني كل شي طال المدى
الله وكيلك ماهتف قلبي لحدا
ومن كتر ماتمتمت إسمك ياهدى
صار غنية على شفاف العبيد
ولو بتعرفي قديش عندي إشتياق
شوقي إلك شوق الملوح للعراق
وشوق والد دوبو جمر الفراق
حتى عيونو يقشعوا طفلو الوحيد
وديت عالميلاد روحي زنبقة
عنوان حبي البكر صورها البقا
حتى تعزيكي بميلاد اللقا
وترجع تهنيكي على الفصح المجيد
عتبتي وقلتي ليش مابتبعت سلام
وماوصلك المكتوب شو عليي ملام
وديت لك مكتوب نهدات وهيام
يمكن يكون الحبر نشف عالورق
يما احترق في قلب صندوق الحديد