كلمة المرسال والفيها
لازم على هالحدّ نلغيها
ونجيب لون جديد للمنبر
يرقّص الناس على كراسيها
شو قيمة المرسال لو خبّر
عن عظمة الجنّه وباريها
المرسال بالبنيان مش أخبر
بمهندس الحاره وبانيها
وعا نوح لمّا الأزرق تجبّر
وبسفينتو فزعو أهاليها
ما بفتكر أنّو غصن أخضر
ردّ السّفينه عا شواطيها
ويللي بروما كرستو عمّر
هيدي نْبَنِت عا إسم فاديها
قلت الهوا مرسال شو معتّر
وشو نفسك بعيدي أمانيها
نسمة البتجبلك هوا أصفر
موسى الكمال لازم تسمّيها
تذكرت كلمه قالها عنتر
بعدا المراجل عم بتحكيها
لو رسلت رمحي مع جبان أسمر
بيقدر بإسمي الجنّ يمحيها
ما في نبي برعيّتو فكّر
قبل الرّساله يكون راعيها
لو ما الرّساله عالنّبي تظهر
ويكلّفو فيها مودّيها
ومهما النّبي بشرع البشر يكبر
ويشعّ نورو في لياليها
بتضلّ كلمة " الله و أكبر"
مش بسّ أكبر من نبي مرسول
أكبر من الأرض وبما فيها