من شوق روحي إلك يابو العيون السّود

كلّفت عنّي الهوى ياخدلك رسالي

وبلّش يروح الهوا عاديرتك ويعود

مصفرّ لونو متل تشرين آمالي

يرجع بخيبه وأسف مدري الدّرب مسدود

مدري بوجهو خبر عن حيّكن خالي

يردّ الرّساله الكنت بوصولها موعود

وصير الكتبتو أنا عيدو على حالي

هاجرت حيّ الهنا قلبي عا شو مسنود

وعرفت غيرك حدا ما عاد يحلالي

رح ضلّ طول العمر عا محبتك محسود

ومقتول عمري معك وبقول نيّالي

بعدو حنيني إلك متل القشر عالعود

وبهديك نومي الغميق وبسهر ليالي

كرمال قلبي المعك يا أسمراني عود

بغياب خيط التّلاقي تخّ مغزالي

من ميل عا غيبتك ببكي أمل مفقود

وبقول راح الحبيب الأسمر الغالي

ومن ميل تاني معي عم بقشعك موجود

طيفك بعيني وإنت سهران في بالي