دخلك لا تتركني وغرامي تفوت
بتفوتني عالقبر لمّا تفوت
ليك روحي عم تفارقني
تركني على مهلي بقربك موت
***
انكتّرت بعد بعيش ربع نهار
خلّيك حدّي وأجِّل المشوار
ارحمني أنا شاعر غريب الدّار
كرمال ما نظمت بهواك بيوت
***
عا فرشِة نزاعي غِفي طموحي
وروحي عم بتسلك من جروحي
ورح تنطفي شمعة أمل روحي
وصرت بين النّار والملكوت
***
وان شفتني سبّلت إيديِّي
وقزقزو بصابيص عينيِّي
تنهّد ورِشّ دموعك عليِّي
وقول الله يرحمك وسكوت
***
صقّعت مش قادر بقى حاكيك
رايح من الدّنيا وعيني فيك
لساني انعقد ربّ السّما يبقيك
بخاطرك يا سحر من هاروت
***
ولمّا المناعي بيحمل وراقي
ما بسامحك تبكي على فراقي
لكن إذا بقلّك أنا باقي
أفلش عا صدري محرمي حمرا
وسكّر بإيدك درفة التّابوت