بو حنّا "زلمي"ختيار
وتاجر متقدّم بالكار
عايش ما بينام الليل
تا يربّي ولادو القصّار
***
عايش بالقلّي ومديون
والبيت ولادو أطفال
متل عصافير الطيون
بينطبّ عليهم غربال
وفي عندو حنا شلفون
رفيقو بيكلّ الأشغال
وعادات التّاجر بيكون
في عندو "زماله" بالبيت
وبو حنّا حمارو بالدّار
***
قامو غدويّة بكير
وشدّو عالجحش الأغبر
ومشيو مسافه كبيرة كتير
شي ساعه الله أخبر
بو حنّا قلّو يا زغير
ركبلك شقله تا تكبر
حنا قلّو ما بيصير
يا بيي حسب القانون
البيّ بيركب عالحمار
***
بو حنا دغري تعلّا
عالأغبر برّانيّه
وما مشيو مسافه إلّا
تلاقى بدفر مكاريّه
سلّم الله حيّا الله
ولكنهن قالو سويه
يا تعتيرك من الله
كيف انت بتركب عالجحش
وبتمشّي إبنك مشوار
***
لمّا شاف الشغله هيك
بو حنا، حوّل بالحال
قلّو وكرامة عينيك
يا ابني بتتمشّى مجال
وحنا تعلّا متل البيك
إلّا وتلاقى برجّال
قلّو عيب الشوم عليك
بييك ماشي وراكب إنت !
لازم تمشي ليل نهار
***
حنّا ما عاد استنّا
وتا يمشي متل الماضي
حوّل يمشي ويتأنّى
تا يلاقي واحد راضي
مشيو حنّا وبو حنّا
والأغبر ماشي فاضي
وهيك الجحش بيتمنّى
يمشي فاضي كلّ الدّرب
مريّح ظهرو من التّجّار
***
حنّا صار ماشي بالورب
وبو حنا ظهرو حاني
وبين الطرح وبين الضرب
تلاقو بمكاري تاني
"قلّن"والله بدكم ضرب
إنتو من أيّا دياني
كيف بتمشوا كلّ الدّرب
ومعكم جحش كبير كتير
بالطّلعه بيحمل قنطار
***
دغري الجماعه تعلّو
عالجحش وقاموا غاره
وصاروا عالدّرب يصلّو
تا تخلص هالتّجاره
وإلا مكاريّه طلّو
من أصحاب الشّطاره
واحد لرفيقو قلّو
كيف بيسوى جحش زغير
يحمل جوز رجال كبار!!
***
نزلو يمشو عالأقدام
ومن حكي الناس احتارو
ساعتها بو حنّا قام
يسب ويلعن مشوارو
صار حنّا يمشي قدّام
وبو حنّا يسوق حمارو
ونحنا هيك بهالإيّام
متل حكاية بو حنّا
صاير فينا جهار نهار