"راحو حباب القلب وبقينا

نستفقد لزهوة ليالينا

وبدل الغزل ننظم فراقيّات

ونبكي على مدفن أمانينا

ما عاد إلنا بالعمر لذّات

ناطرين الموت يطوينا

وصرنا نشوف صحابنا حيّات

والدرب تستتقل إذا مشينا

يا حباب كيف الحب فيكن مات

تا تحاكمونا قبل ما خطينا

وصرتو علينا تلفّقو حكايات

ونحنا منعنا الناس تحكينا

نحنا خلقنا ندوب غنيّات

وإنتو تركتو البعد يكوينا

وتا تعرفو شو قيمة الدمعات

انشالله بتبكو متل ما بكينا

رحتو وشو نفع التمنيّات

صرنا متل مركب بلا مينا

بتحطّنا وبتشيلنا الموجات

وما في حدا عالشط يهدينا

عن بعضها شو بتفرق الكلمات

متل فرق الشهد والكينا

كلمة بخاطركن بلا بسمات

مش متل كلمة مرحبا جينا

رحتو وراحت زهوة الحفلات

ومتل الغُرب ببلادنا صفينا

إنتو نسيتو الحب والرعشات

ونحنا انشالله نموت لو نسينا

رحتو وحتى ترجعو هيهات

يا شماتة الحاضر بماضينا

ما ضل عنا غير هالنهدات

البقيت ع فرقتكن تسلّينا

وكاسة خمر عا سفرة اللوعات

حمرا ومازتها مآسينا

نسهر وعنكن نسأل النجمات

بلكي خبر عنكن بتعطينا

غابو النجوم وغفيت السمكات

ونحنا عن التذكار ما غفينا

منحب نغفى وخايفي الغفوات

من جوعنا للطّيف يأذينا

رحتو وصرنا نكلّف النسمات

تودّيلكن جرحة غنانينا

ونبعت دموع برفقة الغيمات

تا كل ما مرقت على صنين

تذكّر حبايب قلبنا فينا"