من وقت ما طليت عالعالم غريب
إستعرض هموم الدني وآخد وجيب
وبعدني ماشي بفتش عالهموم
بلكي بلاقي هم لهمومي قريب
تلاقيت في أيوب شفتو مبتلي
بلوي زغيري كتير بالنسبه إلي
وكفيت مشواري عا درب الجلجلي
وشفت الصليب وقلت شو هالمرجلي
هيدا صليب والحاملو قلبي صليب ؟
ومن بعد ما تلاقيت بالإم البتول
تبكي وتسقي بدمعها حجار الحقول
سمعت نهدتها القديمه وصرت قول
مش هيك بيكون النحيب بلا أصول
رافقيني .. بعلمك كيف النحيب
ولما مصايب هالوجود كشفتها
حملتها وعن أهلها خففتها
استوهمت منها من قبل ما عرفتها
لكن بعد ما بعين عقلي شفتها
ما شفتها أصعب من فراق الحبيب