تمشي وحلم جديد يمشي قبالها
ومن جهلها توقف تحاكي حالها
وعم ترقص اللهفه بعينيها الزّغار
مش قاشعه بهالكون إلّا حالها
***
والشّمس عا شوار النّهار مسرّبي
فوق الشّفق وقفت غريبه مسرسبي
ومنها اندبح عالموج شعرا مدهبي
استغبن عليها الليل نخّ وشالها
***
وداب السّراب وبلّشو يطلّو النّجوم
والطقس رايق لا رياح ولا غيوم
والنّاس شلحت خلفها تياب الهموم
وهالبنت مدري مين شاغل بالها
***
مشوشره تشحد من النّسمه خبر
تمشي وتوقف تحت إجريها إبر
وختيار شايب كلّخ سنانو الكبر
شروة مسا بغمزه وكلمه مالها
***
وبالليل باعت قلبها للإختيار
ومن هيك صار الليل مسخرة النّهار
تشرين صار يضحك بعرس الإنتصار
ونوّار يبكي عا ورد آمالها
***
بموجة شقاها ضاع مركب سعدها
وللهنا الأبيض ما وفيت وعدها
دشّرتها بحضن التّعاسي وبعدها
تمشي وحلم جديد يمشي قبالها