أنا والليل إخوي من البداية
عرايا لا قناع ولا عبايي
وحفايا ع حلم أحمر مشينا
ع درب من الشمس للشمس جايي
جينا وناسيين منين جينا
يتاما والقدر تعبان فينا
مراكب ضايعين بدون مينا
هِدي طوفان نوح وما هدينا
عمنفتّش ع شاطي اللانهايي
أنا يا ليل خاويتك لأني
أنا منّك وعتم الفيك منّي
اسبقني وخبّر المجهول عنّي
لا يتعب ويبعتلي تمنّي
عطاني اليأس والخمرة كفايي
أنا متلك أنا رفيق السكارة
خمري دموع من سر العذارة
جنوني شعر وعيوبي طهارة
سكوتي عربدة وعتمي منارة
وكفري دين ومليحي جنايي
أنا رفيقك على الآلام صابر
الشقى من قلوبنا عمّر مقابر
وعمري متل عمرك حلم عابر
مضحّي كبش سرّي ع المنابر
ونارك غايتي من دون غاية
أنا صهرك، أنا عاشق ولادك
لكن فرق بين زهدي وعنادك
إنت خلفك مدشّر اعتقادك
وناطر فجر يغسلّك سوادك
وأنا ماشي ما بتلفّت ورايي
أنا يا ليل فلذة من صميمك
أنا بلونك، أنا نوحي نديمك
إنت فرحان شمتان بغريمك
وصياح الديك رقّصلك نسيمك
وحمَام الدوح باكي ع صبايي
أنا عامل متل ما إنت عامل
بعينيّي هموم الناس شامل
عم فتّش ت لاقي شخص كامل
رجعت وشمعة “ديوجان” حامل
وراحت خيبتي تعمل دعايي
أنا متلك مسلّيني سكوني
رفاقي الآخ والنهدة الحنوني
بصوّر شمس ع مراية عيوني
بيرجع ينطلق مارد جنوني
بإيدو يمسح دموع المراية
أنا متلك مضيّعني مقرّي
لأني ما حرقت غيري بسرّي
سترت سر البشر وكشفت سرّي
وإنت سرّك متل سر المعرّي
سترتو وكشفت سر العناية
أنا خيّك، أنا لونّي محلّك
وقدر ما بتخل عليي بظلّك
برجع، يا بعد قلبي، بقلّك
إذا ما رضيت تعطيني محلّك
خود الآخ وعطيني العباية