قالوا إلي شو باك متألم حزين
وكاتع جنحاك متل شي باشق سجين
وع جبهتك صورة كآبة محزنة
ودمعتك حمرة وعيونك شايحين
ولونك متل حبقة عجوز متشرنة
بصحرا والحر فوق الأربعين
بيصعب علينا نشوف راسك منحني
ومش عارفين هالانحنا كرمال مين
كرمال مين؟ شو هالسؤال الولدني؟
كرمال حبي الخالد وحلمي الدفين
يا ناس عيفوني بآلامي غني
ولا تسألوني ، عرفتكن مش عاشقين
وبعدكن عم تسألوتي شو بتي؟
الله يسامحكن إذا مش عارفين
مش عارفين انقلبت عليي الدني
وماتت اللي حبيتها اربع سنين
ضحكو متل ضحك الذكي عالغشمني
وقالو انت شاعر بمرجة ياسمين
شم الزهور وفي هنا العمر إعتني
مشوار جينا عالحياة وراجعين
وليش البكي وبتقول محبوبك فني
وشو بيجبرك تبقى على عهدو أمين
ما لزوم انو تحد أكتر من سني
مهما الفقيد يكون ع قلبك تمين
لا تحد هوني اضحكت ضحكة لئمنة
ماشافها الفادي ع تم المجرمين
لا تحد وينك يا حجار المطحنة
كفي على حبات عمري الباقيين
لا تحد كيف ما بحد يا ارض احزني
وخبي حلاك عن عيون المارقين
ويا ترابي ع ترابي ردني
لازم خمير الحب يرجع للعجين
لاتحد كيف ما بحد والقبر الدني
تسكر ع قلب ودشر التاني رهين
رح ضل اكفر بالهنى وابقى هني
بذكر الـ بدل حبي بقبور الميتين
يا صخرتي الـ ع باب هالقبر الهني
جاوبوني وفلتي قلبك يلين
في تحت منك قلب كان يحبني
مش عم يشق القبر تا يودي حنين
من اليوم حتى انتقل ع مدفني
في رحمة الحبيتها بحلف يمين
يحرم ع جسمي لبس بدلة ملونة
ويحرم عليي غير دين الحب دين
ورح ضل حب الحبها عليي جني
وغني لمدفنها قصايد خالدين
ويحكو عليي الناس شو بيهمني
البيهمني ريح ضميري بحبها
وابكي ع حالي وقول ماتت جوزفين