لمّا كنت شلفون بالعشرين مين كان متلي وكان قدّي مين ما كنت عامل شغلتي إلّا شبرق شبابي وإلحق الحلوين *** كنت مغرم بالعيون السّود ومحبوب نجمي وطالعي مسعود وفي وقتها وين ما كنت موجود يبقو بنات الحيّ فرحانين *** وكان في عندي حبيبة قلب فتّش عليها الحيّ شرق وغرب وكنّا انشفنا بعضنا عالدّرب عالدّرب نقضي الليل سهرانين *** كنّا انتركنا بعضنا نبكي دمعة حنين قلوب مشتبكي وكنّا إذا لعبنا على الدّبكي يحسبونا الناس سكرانين *** كانت ليالي البَسط حلوي كتير آخ لو بتعود شو بيصير كنّا منرجع للهوى بكّير تخمين بيعود المضى تخمين؟ *** ما كنت حاسب للزمان حساب ولا كنت عارف كيف غيري شاب وخمّنت مش رح يبرم الدّولاب تاري دواليب الهوى مجانين *** وكان لي فصل زينة تلات فصول فصل الرّبيع الأخضر المقبول نوّار ودّعني وإجا أيلول وتشرين لاحقني ورا تشرين *** ضاع الشّموخ بلين أخلاقي وفطّمو عنبات أشواقي ودبلت غصوني ويبست وراقي متل ما بتيبس وراق التّين *** صار عمري عذاب عا حلّو وتعشعش بجمسي الوجع كلّو ويا غبن قلبي عليك يا خلّو تصير من بعد الهنا مسكين وتطلع من العشرين للستّين
خليل روكز: شاعر الزجل اللبناني شاعر زجل لبناني من مواليد وادي الليمون، قضاء جزين، عام 1922.
يُعدّ من أهمّ روّاد الزجل اللبناني، حيث أغنى هذا الفنّ كتابةً وارتجالاً.
لُقّب بـ "شاعر الشعب" ...
