احكمني بدون ميول منحازي
وحلّل عِقَد شعري وألغازي
شاعر أنا مصوّر ببّو العين
وعامل جفوني كحل بروازي
متل المعرّي بمجمع البحرين
يلملم أدب عن ذيل غنبازي
الشيطان والمرأه إجوني تنين
ووسوسولي بجنّة الجازي
ونزّلو الصوره على إيدين
برواز حامل لوح وقزازي
وبدل ما أوعا على زندين
وإغفى عا حنوّة إيد هزّازي
فاقت عيوني حامله جرحين
تنزف مدامع لونها فرازي
وحوّم على حظّي غراب البين
ينعي حياتي الما لها عازي
يعني أنا شفت الدّني يومين
يوم عرسي الحامل التابوت
تا يلفّني في يوم جنّازي
***
عم تطلبي بالحبّ حاكيكي
وزوّر حنيني وحبّ إهديكي
شو بتعرفي من الحبّ غير حرفين
دابو على خشونة أياديكي
استرجلي يا دابحه الجنسين
وعيشي بغشاوة جهل تعميكي
من جهتي عندي عيون تنين
من نورها بضوّي لياليكي
وما زالني شاعر ما بترك عين
ترخّص النّظره وتلتقي فيكي