مازال رح تبقي ع ضعفي مكبّره
ومازال مافي عفو عند المقدره
انشالله تموتي وماحدا بدفنك يجي
وقيمك لوحدي ووصّلك ع المقبره
وصدفة ان إجا إنسان تا يحمل معي
بقلّو اتركني وبالوصيّة بدّعي
من ميل تحت النّعش بخفي مدمعي
ومن ميل وحدي بكون حامل جوهره
وكلّ فشخة كنت بقعد بستريح
بزيح الغطا وبتأمّل بوجهك مليح
بسقي شفافك من عطش قلبي الجريح
وبطلب من عيونك شفاعة ومغفره
كل ما ارتحت و رجعت قيمك من جديد
بصير صلّي تالقبر يبقى بعيد
منشان إشبع والنّعش يشبع نهيد
شبعة أبد حامل بنعش الآخره
وغنّي فراقيات وسنيني الكتار
يدوبو ع داير نعشك الأخضر غبار
ونوقع أنا والنّعش آخرة النّهار
وقعة إبن مريم ع درب النّاصره
وبرجع بقيم النّعش عن أرض الهموم
وبشحد شويّة عمر من عمر الغيوم
وبعود بمشي هون بوقع هون قوم
بضيّع نهاري بالمشي وعند الغروب
منوصل أنا وأنتي سوى ع المقبره