ياريت عندي وأخ لوفيّي
عاقد حبّي جبلك هديّي
كنت بهديكي شذا الوردات
وأسرار أحلام الطفوليّي
وكنت بتعمشق على النجمات
بسحّب شلل خيطان فضّيّي
وبكلّف ملايك وحوريّات
تحيكلك بلوزة ألوهيّي
***
وبالبحر كنت بغافل السمكات
وبغطس متل فكر الحراميّي
وبقطف زبد من رغوة الموجات
ومن جدايل شمس مرخيّي
بكمّش وهج وبحوّلو بوسات
بلون أشواقي المورديّي
ومن هون ببعتها مع النسمات
لهونيك لعيونك خصوصيّي
***
والطفل كنت بقشّطو البسمات
وبغرف من عيونو صفا نيّي
وعرس الربيع بشلحو الغنجات
وكل شي معو لهتات عطريّي
وبكلخ من جفون السحر دمعات
كلّها غيره وحنّيّي
وبلفّها بعيون خمريّات
وبروح حافي سلمّك هيّي
***
ومن كل طير بنتّف الريشات
وبفلش طريقك ريش حريّي
وعالمروج بسابق النحلات
بجبلك ضمير زهور بكريّي
وبطير مع أحلام وخيالات
عابلاد مدري وين مبنيّي
بجدلك من سوالف الغيمات
مرجوحتك عاكتاف جنيّي
***
وبغزلك شراشف من الهمسات
وحرام من قلب النعوميّي
وجودلي من السّحر ومخدّات
من شعر آلهة الفنيقيّي
وبرش عاعيونك هنا الغفوات
المحروم منها حظ عينيّي
وخلّي الحلم يحكيلك حكايات
عن حالك لحالك غراميّي
***
هيهات لوعندي حلم هيهات
عاقد ماعندي أنانيّي
بحّولك إنتي أنا بالذّات
وبلبّسك روحي الطبيعيّي
لكن إذا فشلو التّمنيّات
وعمري استسلم للعبوديّي
بترك إلك منّي تلات كلمات
(محبّتي والآخ والنهدات )
من القلب هالبيحبّك هديّي