إنت وأنا وقعنا بعتمة هالدّنـي
دموع مصفرّا من عيون الكدر
منبكي سني ومنضحك لتاني سني
ومش عارفين لـوين سايقنا القدر
لمّـا وقعـنا تعجّبت فينا السّما
والأرض صارت تسأل علينا منين
عيون الكـدر يا ريت كحّلها العما
ولا نزّلت من ضعفها هالدّمعتين
محتار شو جايين نعمل بالوجود
غُرب نحنا ما بيعرفنا حدا
شو بتفتكر إنت وأنت وإلنا الخلود
يمّا بسكوت الصّوت بيضيع الصدا
ضايعين بكون قدّ الكشتبان
وحلمـنا بليـل العبودية غفي
إبقى معي مخبّى من جنون الزّمان
هالليل ما بيحبّ فجر الفلسفي
أو روح أبرم عا دني خلقت جديد
هونيك خلف الفكر ما فيها بكي
هيدي حلم أخضر بعينين العبيد
لكن شبح أسود بعينين الذّكي
لملم حنينك ...عن ترابات الفنا
ومن هالدّني هرّب طموحك والولوع
ويلّا لحقني ...سابقك منها أنا
هالأرض مش مستاهلي تشرب دموع