صباح الخير يا دمعه حنوني

حنينك هزّني وحرّك سكوني

عملي خنسا برقّتها وصداها

وبكتر الدّمع خنسا لا تكوني

وإذا بقيت دموعك عا هواها

وبليل الشّوق لازملك معوني

كرامة دمعة المبدا ووفاها

طلبي عيوني على حسابك عيوني

بدمعة ليل بكّيتي اللّيالي

وبنور المعرفي حرقتي الجهالي

كلامك للدّني شهادة حقيقه

وبتاريخ القصايد درّ غالي

خطري بجوّ الزّجل حرّه طليقه

كتبي وغنّي القصيده بصوت عالي

الشعر شو قيمتو بعين الخليقه

إذا ما كان دمعه أو رسالي

انا عالضّيم قبلك بات جفني

وإلي مع كلّ نجمة ليل صفني

كنت بين القرايب والحبايب

غريب وما حدا منهم عرفني

بصبر أيّوب عاركت المصايب

وزماني لا رحمني ولا نصفني

وقفت ناجي أمل مجهول غايب

ابتسملي حظّ عمري بليل أعمى

وعلى أفريقيا المتلو قدفني

وبأرض النّار والغابه الرّهيبي

قلت بتخفّ عن قلبي المصيبي

وقلت برتاح من همّ القوافي

ومن الكانت إلي وصارت غريبي

وأنا عا مخدّة الوسواس غافي

بنومي عود إبكي عا نصيبي

وعندما فيق لاقي عا شفافي

كلام كتير وللي ما نسيتو

بلادي ومسرحي وأهلي وحبيبي