يانهر وين العدل عند الناس وين
شو هو إسمك بحذف النقطتين
القلب صفى كلب والوهمي سَلك
ولفظة غلط حطت عليك حْمَال دين
أحيان كلمة ملك بتصفي فَلك
وشحطة بكلمة حسن بتصفي حسين
عاكل حال يانهر مش رح بجهلك
عرفتك أنا وعاعظمتك فتحت عين
إنت نهر الأردن ومجدك إلك
وعندك شهودك ناطقة عالميلتين
عايمينك شخص يسوع الملك
وعاشمالك يوسف الحر البتول
ودمعات مريم نازلة بين التنين
***
ياريتني صخرة بهالنهر العجيب
مش مقصدي إحمل إسم فاتح غريب
ولامقصدي إخلد على مر العصور
ولا كون صخرة اللي بقي عليها الصليب
ولا صخرة إبراهيم هالبتشع نور
لا لا..ولاقصدي الأبد فيي يغيب
كل قصدي بالنهر خاوي الصخور
وبين الصخور الحاملة إسم البشر
احمل عاصدري إسم لبنان الحبيب
***
بلادي قصيدة عمرها مليون جيل
الله نظمها بزوغة الفجر الأصيل
وداوود لحنها وسجلها الزمان
وفيروز غنتها بنغم صافي جليل
بلادي عاكتف الكون تلة عنفوان
ضحو جدودي بحبها كتير وقليل
وبعدها مقلع بلاغة وإتزان
وبعدو البحر عاشطوطها خادم ذليل
***
التاريخ بعدو عن بلادي ترجمان
وكان كل ما طل عبلادي دخيل
أسود الجبل تطلق لقوتها العنان
وترد قايد جيش غازيها قتيل
ولبنان بعدو متل ما من قبل كان
فيه البطي رهوان والأعرج أصيل
وشعب الجبل جبار عند الإمتحان
عامحبة الأوطان مابيرضى بديل
وياصاحب المنظر على هالمهرجان
نحنا بهالمنظر منربحلك جميل
ومش بس في منظر جميل بهالمكان
كل حبة من تراب بلادنا
حكاية خلود واسمها منظر جميل