بإيام فقر وجوع ومصايب كتار

والكون من كفر الطّمع بركان نار

حرب انتهت والتّانيي شعلت جديد

والنّاس لللقمة عا جمر الإنتظار

ومركب محمّل قمح جايي من بعيد

صواريه بتغنّي نشيد الإنتصار

رعشة أمل أو كهربا ومسّت حديد

بالشّعب لمّا المركب عْلى الشّطّ صار

وقبطان ما حلمت عيونو بمتل عيد

ساعة وصولو بالسّلامة عالدّيار

عيد الخلاص من العواصف والجليد

وعيد السّعي بالخير عزّ وإفتخار

وبنت الملك بحكايتي بيت القصيد

المركب لها وبأمرها شقّ البحار

تا يجبلها الإلماس من شطّ العبيد

وتزيد ثروتها كنوز وإعتبار

بتقدر تضحّي بْكلّ عبد وكلّ سيد

ولا تخيس خزنة قصرها درهم عيار

كلّ شي بعيون زوغتها زهيد

ما عدا البيكون أصلو من الحجار

نزلت على المينا ومقصدها الوحيد

تلاقي الكنوز وهون مقصدها انهار

لاقت قمح بيعكس ما كانت تريد

وزرع التّمنيات ما ردّ البدار

بسكرة فشل وجمود نادت عا عميد

الباخرة وقالت إلو في إحتقار

وين الذّهب والعاج والدّرّ النّضيد؟

خالفتني وفضّلت ليلك عالنّهار

تنهّد عميد الباخرة ورأيو السّديد

سلطان مش معقول يرضى الإنكسار

بالرّغم إنّو صاحب الحقّ وعنيد

ما راد يتعرّى من تْياب الوقار

قلّها يا مالِكي العقل الرّشيد

إنتي بتعرفيني على امورك بغار

برمت الدّني وعن مطلبك ما كنت حيد

إلّا بعد ما الرّيح عكس الخطّ دار

ولمّا عجزنا من المعادن نستفيد

وما وجدنا مطلبك بالإختصار

شحنّا السّفيني قمح للأمّة مفيد

وبيكافح جْنون الغلا والإحتكار

كلّ كمشة قمح بتموّن شريد

بس الذّهب ما بيطعم ولاد الزّغار

وعا كل حال يا مالكي العرش السّعيد

جبنا قمح من حيث ما وجدنا ذهب

بدنا العفو من جْلالتك والصار صار

*****************************

هون ابتدا شرّ الملوكيّة وظهر

من قلب لاكن قلب يا ريتو حجر

وقالت إلو بْلهجة نفور وإنتقام

من طبع جنّ بْعظمة الجاه وكفر

رفضت أمري يا قليل الإحترام

وجايي تقلّي القمح أحلا من الدّرر

إرمي القمح بالبحر وفرقني بْسلام

وخلّي البشر من جوعها تاكل بشر

قال العميد؛برمي القمح شو هالكلام ؟

هيدا أمر ما كان منّك منتظر!

بكرا عليكي الشّعب بيحطّ الملام

وحكم الشّعب أقوى من جنون القدر

لا تشلحي القمحات بالميّي حرام

الحرب جايي وْحالة الكون بْخطر

وإنتي بنت سيّد من مْلوك العظام

لازم بأمر الباخرة تعيدي النّظر

قالت اعطيتك أمر وبإسم النّظام

ارمي القمح بالبحر وعليي الضّرر

الملك ملكي وْهيك في عندي غرام

لا تعترض عا أمر من حكمي صدر

ولمّا العميد بخطّة التّنفيذ قام

قلّها كلمة بنت قلب انقهر

بدّك تموتي جوع وتشوفي ختام

عمرك على التّاريخ عبره من العبر

وإيّام جاهك بعد ما كانت حمام

بدها تصير غْراب وليالي كدر

وقلبك الجوعان ما يشبع طعام

وتتبهدلي وما يضلّ من مجدك أثر

وِقْفت وغطّت حقدها بالإبتسام

بسمة خبر مطوي على أبشع خبر

وفي ايدها خاتم إلو عظمة مقام

بين الخواتم إسمها عْليه انحفر

شَلحتو من إيدها بسرعة سهام

لبعيد حتّى بلجّة البحر انغمر

وقالت : متى ما خاتمي عالموج عام

وعاد ليي بعد ما إيدي هجر

معقول إنّي جوع لاكن بالمنام

ويزول ملكي ان صارت العبدة قمر

ويمكن اذا شفت السّمك بالبحر نام

بينام عزّي وتاج عزّي بينطوي

وبتصير إنت المبتدا ونحنا الخبر!

****************************

وبالبحر لمّا مركب القمح اندرى

ووصلت خبارو للمداين والقرى

قامت قيامة شعب جوعان وبصير

حتّى عمل في كلّ بيت مْظاهره

ودار الزّمان وغيّر قْرار المصير

وخلقت من الحرمان ثورة مقدّره

الجوع كافر والظلم عمرو قصير

والشّعب باع الذّلّ والعزّ اشترى

وتاج العبوديّة بمعركة الضّمير

تحطّم تحت ثورة شعوب محرّره

وبنت الملك من بعد هالفصل الأخير

من بعد ما عجبينها الظّلم انقرى

وبين الذّهب والتّاج والعرش الكبير

وفرض الأمر عالميمني والميسره

تمرّد عليها الشّعب وانهانت كتير

وخسرت حياة الفخفخة والزّنطره

والقصر صفّى كوخ والأطلس حصير

وتكريمها لعنات بدل المبخره

وصعبي بحقّ الزّنبقة الحدّ الغدير

تدبل بنوّار الغوى والغندره

صارت وحيدة وْحلم زهوتها أسير

تبكي وعلى الماضي الجميل محسّره

لا جواري ولاعبيد ولا نصير

هيدي نهاية كلّ ظالم يا ترى؟

ومتل ما كبرت على خبز الفقير

تكبّر عليها الخير والجوع افترى

ورجعت لخدمة نفسها بمسكن حقير

تطبخ وتغسل بالشّقى والقهقره

وما بقي معها من المال الوفير

إلا القليل وشو بينفعها القليل

واللّه يعين الكون من جوع "المرا"

****************************

وعا خلعها ما دار دولاب السّني

وداب الظّلام وبيين النّور السَّني

وبنهار حسرة قلبها عا مالها

وعا مجدها وعا عمر عزّ وسّلطني

بايع سمك بالحيّ مرّ قبالها

صدفة قدر تا تدلّ عا كفر الغني

"وحوّا "خطر أكل السّمك عا بالها

وأخدت من البيّاع شروي هيّني

وما فتحت السّمكي تا شافت حالها

قدّام خاتم كانت تظنّو فني

تذكّرت بالباخرة أفعالها

وراسها عالأرض بلّش ينحني

وسمعت من القبطان كلمة قالها

"بدّك تموتي جوع "مهما تغتني

وقفت تودّع أرملة آمالها

وحنّت لشبر تراب من أصلو دني

وطلّو ضحايا ظلمها وإهمالها

يتقهقرو من جنّة العيش الهني

وسفينة القمحات صارو حبالها

مراجيح بين عيونها والمطحني

ردّت أمانتها وقفي مرسالها

وعرفت بأنّو كفرها عْليها جني

الأقدار شلحتها تحت غربالها

وبقيت مع الأجيال قصّة ظلمها

الإيّام تحكيها لزوّار الدّني

ما أظلم الإنسان في كلّ الأمور

وحش متديّن ، إله من الغرور

بيقتل ملك منشان كمشة من الطحين

بيعتدي حتّى عا سمكات البحور

بشو مجرمي هالبنت إنتو مجرمين

بتعادلو الغلطة بحسنات الدّهور

وين التّسامح في شريعة كلّ دين

وليش عقل النّاس بيحبّ الشّرور

أهل الحكم لازم يكونو ظالمين

لو ما الظّلم ما في أمان ولا شعور

وحتّى الحمامة ما خلق فيها الحنين

لو ما تشوف بْعينها ظلم النّسور

لا لا وليش الطّين يظلم إبن طين

وعا كلّ حال النّاس مش متل الطّيور

ولا عدل نقشىع ناس منّا معذبين

وناس ترقص بالجواهر عالقبور

صبّولها عالقبر لعنات السّنين

هيدي بنت حوّا الخياني والفجور

هي مجرمي ومعبودها الكنز الثّمين

هيدي غراب الشؤم عا مرّ العصور

ويا عميد الباخرة الهادي الرّزين

الخلّيت من صرخاتك الخامل يثور

شو خسرت لو عينيك كانو مغمّضين

ولفلفت هالطّابق بإدراك الصبور

مش حقّ تنسى أمرها وتنسى اليمين

ولاحقّ تبدل طاعة الجندي بنفور

انت جندي المُلْك والجندي رهين

أمر القياده وملك سكّان القصور

لا لا إنت مخلص إنت جندي أمين

وعا مصلحة شعبك وأوطانك غيور

إنت خلقت تا تعيش مرفوع الجبين

وللتضحية تكتب بدمّاتك سطور

إنت درع الشّعب وسياجو المتين

يا زارع جْهادك بِليل الشّعب نور

بهنّيك وبهنّي جميع المخلصين

البيحصّلو حْقوق الترّاب من التّراب

وبيحطّمو قْلوب الصّخور عْلى الصّخور