ضلّيت قضّي سهرتي بوادي الهدى
وفكّرت بالإنسان أوّل ما ابتدا
وشردت بالتّفكير عا وسع المدى
يا غبن ما ضيّعت تفكيري سدا
بإنسان أصلو تراب .. هالتشّبيه عار
***
تأكّدت من تحليل فكري والنّظر
الإنسان أصلو لا تراب ولاحجر
عنصر طبيعي مسلّح بكلمة بشر
ولو ما التّطوّر والتّحضّر ما ظهر
في مظهرو ولا انزاح من خلف السّتار
***
وأكبر دليل لمّا اختبرت العالمين
تعرّفت عا بقوة جماعه عايشين
من معدن الإنسان من ميّي وطين
وبعدهم رغم التقدّم بالسّنين
في كلّ معنى بيشبهو قرود الكبار
***
والطفل ساعة ما بيخلق بالوجود
خلقتو بتشابه زغار القرود
الإنسان أصلو قرد ما بدّو شهود
وأكبر شهاده منظرو بالإحتضار
***
الإنسان أصلو تراب شو هالمستحيل ؟
لولا نكون تراب كنّا عالقليل
ما منفترق عن بعضنا بأهون سبيل
تراب الدّني بيلزق عا بعضو ألف جيل
وفي أغلب الأحيان بيصفّي حجار
***
لاتميّزو الإنسان عن غيرو كتير
بالعاطفة والحبّ والعقل الكبير
وبالمعرفي وبالإرتفاع وبالضمير
الإنسان للشرّ انوجد بالإختصار
***
الإنسان لولا يكون في عندو شعور
ما بيتعدّا عا سمكات البحور
وبيسخّر الحيوان وبيئذي الطّيور
***
شو في معو الإنسان أكتر من الحيوان
إلّا الكفر والشّرّ خلقه معو خلقان
بيضرّ ما بينضرّ مؤمن بلا إيمان
لو شاف نحلة برّ بتشحد من البستان
في سلبها بينسرّ تا تعيش بالحرمان
ولو طير حدّو مرّ تا يسمّعو الألحان
بيقوى بقلبو الحرّ وما بيتركو فرحان
بيطلق عليه النّار
***
وين الضّمير بجنس من معدن طمع
وكلّ تفكيرو لقتل المجتمع
ومحبّتو غايي وصدى صوتو انسمع
بالّلي قتل خيو وجفنو ما دمع
ما زال عندو عطف وين العطف صار
***
الحيوان عالإنسان صعبي يفتري
الإنسان كلّو شرّ مجرم عالبري
يا ريت من حيوان عطف منشتري
***
تأمّل بفوج نعاج طالع من السّيري
لو علّقت بسياج شي مقصّره زغيري
إلها الرّفاق علاج وعن عاطفي كبيري
بتركض فواج فواج تبرهن عن الغيري
الحيوان ما بيحتاج لمواهب كتيري
عندو محبّي وحاج عايش بلا حيري
وعالدّرب صوص دجاج
***
جرّب تلمّو بتنقودك إمّو
تا بجنحها تضمّو في وقتها بتعود
تعرف بدون شهود وين العطف موجود
بتقنع بتفكيري إنّو البشر كفّار
***
وكلّ شي بالأرض خير من البشر
وانكان بدّك بعد في عندي صور
بعطيك من شاعر بهالأمّة كفر
وانت إقشع قدّ ما عندك نظر
يا بتنطلق يمّا بتبقى بهالحصار
***
سمعت لمّا الرّبّ كوّن هالدّني
ومنها صنع مخلوق فيها يعتني
قال شال كمشة من ترابي ليّني
وصار يجبلها وعليها ينحني
وعاود نفخ فيها وربح هالإنتصار
ولمّا انجلى آدم بهندامو الحلو
تحمّى وسجد قدّام اللّه يسألو
خلقتني وحدي ومصيري بجهلو
قال شال اللّه ضلع آدم حوّلو
حوّا ... وقلّو محرّمي عليك التّمار
***
وهوني إجا الشّيطان خدلك هالحكي
أوهام كيف بيقتنع فيها الذّكي
وآدم أكل تفّاح شو هالمضحكي
عيشو بهالتّفكير يا عقول الزّغار
***
وقال انطرد آدم من الرّوض الأمين
وقلّو بتاكل خبزك بميّ الجبين
وقلّها لحوّا عذابك بالبنين
وبالمختصر عملو الجماعه السّالفين
طبخة بحص زادولها ملح وبهار
***
يا ناس آدم فرد بالأرض انوجد
يا هل ترى كم جاب من حوّا ولد
النّاس مليارين صارو بالعدد
من عدا الأجيال يلّي عم تموت
والبيّ واحد ... هيك زوّدتو العيار
***
تا نقول آدم جاب عشره من الولاد
ومطرح ما خلقو خلّفو وعملو بلاد
مين من غير شرّ خلّف هالعباد
وكيف صارو لهون ولخلف البحار
***
وان قلت لي أولاد آدم خلّفو
بقلّك صحيح بيخلّفو وبينطّفو
وانقلت لي أربع صفور بيألّفو
بقلّك خراب الكون عا قدّ العمار
***
آدم يا خيي كان شخص بفرد لون
وحوّا بلون سعادتو والفرق هون
وما زال آدم بيّنا والأصل عون
بتشرق علينا شمس وحدي بفرد كون
وليش في أشكالنا ضاع القرار
***
ليش فينا ناس بيض وناس سود
وناس حمر وصفر والظاهر شهود
انكان هالتّشكيل من وضع الوجود
الشّمس وحدي ولونها ما لو غيار
***
البيهمّ نعرف أصلنا وبيهمّنا
لسان الحقيقة ما يعود يذمّنا
يعني يا بتكون الطّبيعه إمّنا
يمّا الحنونه مشكّلي برشّ لبدار