مين انظلم بالكون متلك مين
يا شقرتي يا حلوة الحلوين
كيْف زوّجوكي لشايب وختيار
وعمرك بعد ما لحّق العشرين
***
كيْف زوّجوكي لشايب وختيار
محتار مش وحدي أنا محتار
وقدّيشها نغصه بقلب نوّار
بنتو البكر تاخد إبن تشرين
***
وينو العدل يا وردتي وينو
تا عاتبو تا حطّ عا عينو
وشو هالعداوي البينك وبينو
بيّك من الحصرم أكل تخمين ؟
***
يلّي عشقتي القرد عا مالو
المال انفقد من إيد حمّالو
والقرد باقي قرد عا حالو
الله يساعد حظّك المسكين
***
من رنّة الأصفر حواليكي
شفتي الشّقا سْعاده بعينيكي
شو زاغطك شو صاير عْليكي
تا تاخدي ختيار بالسّتين
***
يلّي خلق حظّك مع السّمرا
صابك، متل دهني على جمره
ومش عدل يا تفّاحة الحمرا
تاكل حلاكي شفرة السّكين
***
يا شقرة القدّ الدّني كلّا
صبح الهنا عا جبينك تجلّا
وصام الحسن عَ دْيالك وْصلّا
مش بسّ وحدك ظالمك الله
إنتي وأنا بهالعمر مظلومين