يابو فهد قلبي تقل فيه لحام

كنه براس التاج تكوى عروقه

أسباب طيرٍ مات والناس صيام

بآخر شهر تسعه طوينا سبوقه

النادر اللي يعجب العين لاحام

يازين تنجيمه ومأزين اخفوقه

صيروم لا حوّل على الخرب جزام

وان طار واقفى عن نويّه يعوقه

عز الله اني ضايقٍ عقب غنام

آلحق على القلب المولع حروقه

ان ماحصلي سجةٍ مثلي العام

اخذ بين الصقاقير روقه

لا كان مدري عن مقابيل الايام

يا الله عسى حظي تساعد وفوقه

أنا غرامي شقة النور مجهام

الفجرلا قفى الليل نوره يسوقه

لا طاب نوم اللي ليا نام ماقام

اكبر ضحى ياكل غداه وريوقه

يسهر على البيلوت وفنون الانغام

وكشف البروق اللامعه مايشوقه

ما لايعه لكم الصحاري بالاقدام

ولا احفت ذعاذيع الهبايب رموقه

ما هو بمثلي بين عاذل ولوام

من شان نفسي للضقاره عشوقه

قلبي لشرسات القرانيس مريام

اللي لهن بيض الدواغر علوقه

هذا غرامي لو تجي لي باالأولام

مالي هدف وش باع وشلون سوقه

اليا قطعت (البتر)وعروق(لزّام)

ضاعت همومٍ بالضمير مخنوقه

في ديرةٍ مابه مزارع ومرسام

بين (الخرم)و(الهوج)و(اشعاف لوقه)

مع ربعةٍ نقوة شغاميم وحشام

وخويهم يحشم ويعطى حقوق

الكل منهم بالمواجيب مقدام

نفسه على فعل المراجل سبوقه

كل ابلجٍ يعجب مقامه ليا قام

مستارثٍ طيب النبا من عموقه

ماهو لغاوي ولا هو بشتام

صدره وسيع وزين الاخلاق ذوقه