لا تازن الرجّال لا شفت زوله

وزن الرجال اعقولها يافتى الجود

دلايل الرجال فعله وقوله

تحكم عليه بمنطقه علم موكود

ماينفع الرجال جسمه وطوله

لا صار مايدري عن النقص والزود

كسب المعالي مايجي بالسهوله

يصعب على اللي مايجامل على الكود

المجد عشاق الكسل ماينوله

دربه على اللي يجهل الطيب مسدود

وحفظ الشرف مبدا صفات الرجوله

والمتزن ماهو على درب منقود

ومرافق الجهال يابن الحموله

نقصٍ على السمعه وتعقيد وعقود

كلٍ جليسه يقتدي في فعوله

المعتدل واللي عن الخير مصدود

ومع الأسف بعض العقول معزوله

ماتقل بالدنيا لهم رب معبود

ماخافوا المولى وطاعوا رسولها

للي له العبّاد خشّاع وسجود

ماحسّبوا يومٍ حسابه وهوله

يشيب رأس اللي هكاليوم مولود

يطرق منافيذ الخوافق ذهوله

يوم الحساب اللي به العبد موعود

بأخر نفس لا نوخت به ذلوله

التفاهم بين ناشد ومنشود

عند الضريح أخر محطه نزوله

النفس تصعد والجسد مرتع الدود

يأهل العقول المبصرات أحسبوله

ترى الحياة بلا عمل مابها فود

اعمل عمل واطلب من الله قبوله

منهج طريق الخير واضح ومحمود

دامك نشيط وكل شئٍ تنوله

ترى السفر له حد والعمر محدود