لا شفت لك مغرور يضحك على الناس

تراه مايسوى المغفل لباسه

لا تمنعه شيمه ولا يمنعه باس

بعض العقول يصير فيها التماسه

يرى بنفسه مثل عنتر وجساس

وعند المره مايقطع السيف راسه

ولو الرجوله وزنها قدر وقياس

مازاد عن مثقال ذره قياسه

من غرته نفسه حصد زرع الأفلاس

الزود ينقص لا يغره احساسه

والكبر للي قدرته تحيي الانفاس

علاّم مابصدور جنه وناسه

الناس تفرقها الطبايع والاجناس

فيهم سباع وبالاوادم بساسه

المجد للي سمعته ترفع الراس

وإلا الردي فرعه يعوّد لساسه

كثر التجارب بينن غيب الارماس

وعرفت مثمون الذهب من نحاسه

عليك بالطيب ليا صرت عساس

طلق الحجاج اللي بقربه وناسه

اللي ليا مسك من الوقت مساس

ينعشك من طيب المروه وباسه

وإلا الردي لو شام للطيب ينحاس

الطيب كايد مايجي بالطفاسه