ياناس بالعادات شفنا الغياره

رخص الشرف والطيش دقت طبوله

بعض شباب اليوم ضيع وقاره

خص الذي درب المعاصي ميوله

مايفهم اللي ينفعه من دماره

ولا يحترم دينه وملة رسوله

يعوم طول الليل في كل حاره

مابه شرف دنيا ولابه رجوله

يفرض على نفسه اسلوب الحقاره

ومن شان فعله مانفع زين زوله

على الخنا يسهر ويرقد نهاره

وأمه وأبوه مضيقتهم فعوله

عقله ضعيف ويدّعي بالشطاره

وله شلةٍ لا مرهم صفقوله

من بينهم معروف رمز الأشاره

وان طافهم ما شافهم صفروله

سلك التفاهم بينهم والعياره

الفاظ تنفاها النفوس الخجولة

قالوا تعال وكلهم بانتظاره

نبي لنا مع هجعة الناس جوله

خسارة ياكبرها من خساره

ليا عوّد البالغ لعقل الطفولة

واستثني اللي نهج درب الاخياره

كارهالمستقيم اللي نزيهه اسبوله

اللي مع الطرق السليمه مساره

حافظ مبادي سمعته والحموله

العقل والدين الحنيفي شعاره

وجيران بيته بالصلاة اشهدوا له