ياهل النياق اللي عليهن تصكون

من فضلكم لا تسجنون البهايم

ما فيه داعي للبهايم تحبسون

خلو عطايا الله تذب الخرايم

ياليتكم عن مشتراها تجوزون

والا تبّعد عن صطول القمايم

اما عطوها حقها لا تشحون

والا اتركوها مالكم بالظلايم

بحقوقها اللي واجبه لا تعيون

الله عطاها للصحاري قوايم

البل بها شجعان نجد ايتعزوون

اللي وراها يجدعون العمايم

مقدارها عند المناعير مضمون

يوم انها بين القبايل غنايم

ليت الذي تحت المقابر يشوفون

اللي عن البل جاهدوا بالعزايم

عنها بميدان المعارك يهوشون

يوم الرمكتعطي هجوم وهزايم

هذا وانا ما افرض على الناس قانون

وجهة نظر ما افرض عليهم لزايم

واللي عطوها حقها ما يلامون

بعناية البل مالحقهم لوايم