لو كل رجلٍ ينقل الطير صقار

كان الصقاره ماتغير سنعها

مير الصقاره تختلف فيها الافكار

وهذا سبب عيب الطيور ووجعها

الطير له عند الصقاقير مقدار

عند الرجال اللي حقيقه ولعها

وإلا الغشيم يخلي الطير بوار

يشري من العالم ويدمر سلعها

ولا تامنه لا يشوي الصقر بالنار

كلمة (مثل) كلٍ بسمعه سمعها

يقوله اللي ماذكر شي ماصار

ابيات موجز للجريدة دفعها

توجهت لمراقب الشعر مسيار

اما نشرها صح وإلا منعها

واللي يبي يأخذ مع الوضع مشوار

يمكن يجاريها وينساق معها

وتصير وجهة رأي مابين شعار

واهداف موضوع القصيده جمعها

وان كان ماناسب هدفها للاحرار

صارت يتيمه مستواها قطعها

اخطت هدفها واختفت عنها الانظار

واللي درس موضوعها مارفعها

وكان اعترضها من هلّ الشعربيطار

يعيش من شاف الفتوق ورقعها