يابو حسن غشام ماهو على الكيف

عيّا يحول لو ربطنا الحمامه

يقول ابقعد بالهضاب المقاييف

قد هج مني ماحسب بالسلامه

يقول ابقعد بالبراد الهفاهيف

اخير من قصرٍ عليّه اردامه

مبرقعٍ راسي ومربوط ومخيف

ولاشفت عندك يالحويفي كرامه

بالبر انتف ناعم الريش تنتيف

آكل طري الهبر واترك اعظامه

وعندك على جلمد بعيرٍ تقل ليف

ياخذ بحلقي شدتينٍ وقامه

والبق ياخذ له عليّه تصانيف

وحتى الدجاج يهوزني به حدامه

ياطير تكذب ياردي المعاريف

ماجاك منّا يالمفضّح ملامه

غداك من هبر البكار المشاعيف

اللي كبر رجم (النميري)سنامه

مرباعها خضر الفياض المطانيف

ترعى من (الشملي) ليا خشم (رامه)

انشد (عريفج) يوم احسب المصاريف

شهد ووقع لي ببسرة بهامه

واجبك نركض به مثل واجب الضيف

لا واخسارة حذفتي للعمامه