ما بالكرم يا زول عيب ومعايير

العيب باللي يالردي ينكرونه

لعل بيتّ ماتجيه المسايير

واللي يبون الكيف ماينحرونه

ينزل عليه الفقر قسمه وتقدير

من واحدٍ كل الملا يرتجونه

مثبى الرخوم اللي تهاب المخاسير

المال لأعمار الفناء يجمعونه

أخص من هو عند نفسه كما الزير

والمرجله عنها الرخامه تخونه

محروم مايقدر على نية الخير

مثل العقنقل بس يدرج مكونه

عساه يفدى الطيبين المناعير

اللي ليا اقبل ضيفهم ينطحونه

اللي ليا شانت وجيه المثابير

بالواجب الموجود مايذخرونه

والطيب سلعه للوجيه المسافير

كان الردي يحسب كرمهم مهونه

العيب باللي به عن الطيب تقصير

اللي ليا أوجس نايبه غار لونه

وشعاد لو يملككنوز ودنانير

محروم ماله غير نظرة عيونه

لا قربوا عند الضريح الحفافير

والمال ضاع وصاحبه يدفنونه

ما نال به طوله ولا نال به خير

حصل غثاه وورثته يقسمونه

ويبقى الثناء لأهل الثناء يالمعاثير

وجزاء الكريم من الكريم المعونه