ياهاجس غلاها بالصدر فضّها سيره

وَلاَ تَنْبِشْ جْرَوْحٍ لَهَا وقت مِنْدَمْلَه

غرام ٍ ذِبَلْ غُصْنَه وِطَارَتْ عَصَافِيْره

مَحَاه الزمان ومَابِقَتْ مِنْه لو جُمْلَه

وانا حبيّبي ماسدّ في غيبته غيره

أخطّه على سطر المقادير وارسم له

شَرَبْتَه غرام :وحُب :مع شك :مع (غِيْرَه

وروحه مَعِيْ ثَمْلَه :وروحي معه ثمله

عَرَفْنا الْوَصُل روضٍ تفّتق نواويره

تمرّه صباحات الغرام وتبسّم له

هوى الصبح مع صوت البلابل مساييره

ومزونٍ مخابيها على الخير مشتمله

قبل مايجي صبحٍ تعاقب معاصيره

عجاجٍ يقول العصر الاوّل تَرَحّمْ له

يجرّ الْفُرَاقْ اللي غَزَتْنَا طوابيره

تتالى جيوش الْظُلْم حَمْلَه ورى حَمْلَه

خذاها غنيمة حرب واظلم سما الديره

وسَحَبْها على دربِ جَرَحْ سَاقَهْا رَمْله

وانا واقفٍ والجوف شبّت دوافيره

وعناصر عذابي في يد الوقت مكتمله

بَلَعْت الفراق وشرّ وقتي قِتَلْ خيره

وحَمَلْتَ العذاب اللي كِرِه كَاهِلِي حَمْله

تداعت عظام الجسم من قوّ تأثيره

وانا في حزام الصبر قُمْت اتحيزم له

لو العبد يدري ما تخبّي مقاديره

فلا كان سرّح في فجوج العنا زمله

جرى ما جرى في حكمة الله وتدبيره

قَرَيْنا النهايه وافترق شملي وشمله

ياهاجس غلاها كل ماجت لها سيره

تجدّ الجروح اللي بوسط الحشا سَمْلّه

وانا لاَ فضى كاسي من الضيق والحيره

أمدّه واقول لساقي الحزن خذّ وامْله