تدرين ويش اللي تركتيه للروح

عند الوداع اللي قَطَعْ عنق الافراح

ثورة حزن مجتاحةٍ دولة البوح

وسحابةٍ برّاقها بالقهر لاح

وسِيْرَةْ خَطَا:ليت الخطا كان مدموح

وقلبٍ شبع ضيق، وغرابيل، وجراح

وجرح الخفوق اللي بيمناك مفتوح

على براويزه حمام الشقا ناح

ودرب الجفا اللي مالنا فيه مصلوح

والخاطر اللي من غثا الوقت مارتاح

وسمر الطعون اللي بِدَتْ تنهش الروح

وضيٍّ هجر من غيبتك عين مصباح

وحرقه،وضيم،وضيق،وهموم،وجروح

وباقي خرز منثور من خيط مسباح

ودمعٍ على خدّ المقادير مسفوح

وصدرٍ تزاحم به سكاكين ورماح

وعينٍ تسولف للسهر قصة النوح

وصرخة يتيمٍ ما سِمَعْتِيه لو صاح

واقسى مسامير المواجع على الّلوح

وباب الفراق اللي بضبّه ومفتاح

وغصنٍ يِشَوْحِنّه كفوف الهوا شوح

ثاوي وِتَلْعَبْ فيه اعاصير. وارياح

ورصاصة الرحمه من كفوف مملوح

وجثة ذبيح،ودمع ثكلى،وذبّاح

وإحساس شاعر في فيافيك مطروح

ونزف الخفوق اللي بصدر الورق طاح

هذي بقايا ما تركتيه للروح

روحٍ نزعيتها قبل نزع ا لارواح

على كِذَا:ولاّ كِذَا منك مذبوح

واللّه يِعَوّضْني بِعُمْرٍ مِعِكْ راح