حبيبي جيت طيف وسولف السان الْوَلَهْ واطراك

وبدت قصة غيابك تنبش جروحي وتدميني

وربّي كثر ما حاولت نسيانك عجزت انساك

لأنك مثل روحي بالجسد والروح تحييني

تصدّق من غَلاَتَك لو ثواني مَا قِدَرْت أسلاك

أنا وشلون بَسْلاَ وآنت كلّك عايشٍ فيني

حبيبي وين مَا لدّت عيوني با لنظر تَلْقَاك

ياعيني وان قِصَرْ عَنْك النظر صوتك يناديني

وِلَوْ تَنْظُرْ لِكَفّك شِفْت قلبي خاتم ابْيمناك

وانا في طوع قلبي وين ما يمشي يِمَشّيْنِي

قمَرْ عُمْري فِزَعْ ليل الغرام وخاف من مسراك

وانا ليل الغرام وغِبْت يَا بدرٍ تِضَوّيني

فَقَدْك المجلس اللي ضَمّنَا ، والباب ، والشباك

ورصيف الشارع اللي تَسْلِكَهْ ويديك .. بِيْدَيني

وعيون الدور داخل حَيّنا اللي كنت فيه القاك

أحس بصمتها صوت الحنين اللي يِبَكّيني

وشوارع هالمدينه كُلَّهْا تبكي على فرقاك

وتنادي خطوتك وتقول فَغْيَابِكْ وحشتيني

وليل البرد في فصل الشتا اللي فيه كنت ادفاك

إلى مِنْ جَيْتِكْ ارجف وَاسْوَدْ اهْدَابِكْ يغطيني

حبيبي كل هذا اللي ذِكَرْتَه بَعْضْ مِنْ ذِكْرَاك

دخيلك كيف رِحْت وَطَاوَعَكْ قلبك تخليني

حبيبي وانت معزوفة غلاي وخاطري غنّاك

غناوي عَوْدَهَا يِعْتَبْ عَلَيْ والَّناي يرثيني

يضيق الكون في لحظة زَعَلْك ويِنْفِرِجْ برضاك

وانا لاَ مِنْ زَعَلْت ازّعَلْ مَعَكْ وارضاك يرضيني

كِتَبْتَك عشق في دفتر غَلاَيْ وكُلْ يوم اقراك

ورِسَمْتَكْ طير شَوق وعشعش ابداخل شراييني

ونِبَتْ ورد الربيع بروض عمري يوم سِقْت اخطاك

على درب المحبَه وابتدت ما بينك وبيني

وكِثَرْ ما اشْرَبْك شوق بنظرة عيوني كِثَرْ ما اظماك

وَلاَ تَرْواك عيني وانت تسكن في ضِيا عيني

قَسَمْ با للّي خَذَا من غيرك ايات الحلا واعطاك

فَلاَ حبيت غيرك في الْبَشَرْ وانت اسئل اسنيني

أنا وشلون احبّ وكُل عرقِ من عروقي جاك

مسيّر لك غرام و منفلت حَبْلِهْ من ايديني

وربّي كل مَامَرّت حروف اسمي بِبَابْ اشْفَاك

أحِسّك تقطف اجمل ورد با لدنيا وتهديني

فداك اللي مضى لي من عمر واللي بقى يفداك

وفداك اللي عَرَفْتَه بالزمن من ناس غاليني

أنا قبل التقي بك والتعاسه من هِنِا ، وِهْنَاك

تحاصرني بليلٍ يسكب الْوَحْشَهْ ويسقيني

أنا عمري لقيته يوم عانق مركبي .. ميناك

هنا جيتي سحابٍ من صدوق العشق يرويني

أحبك ليه ؟ مدري بس اعَرْف ان العمر لولاك

مجرد حلم ليله ضاعت ابْصُبْحِهْ عناويني