سرى مزن القصيد وبالعيون اخيال

يلوح البرق وعيوني تِنَاظِرْ به

دموع الديمه اللي وَبْلَهَا همّال

سِقَتْ قلبٍ طعون الوقت تزهر به

ويِدَرْهِمْ لِكْ جِمَلْ شِعْرِيْ وانا الْجَمّال

وحمام الشوق من صدري كفخ سر به

وتذكرتك وانا اقطع بالدروب اميال

لعينك يالهنوف الجادل الذربه

ياعقدة عمري اللي مالها حلاّل

زماني مثل ماهو وش تغيّر به

يِطَوْل افْرَاقَنَا وانا على ذا الحال

خطاوي تايهه في سِكَةْ الغربه

وِحِيْد:أقطع مسافات الندم رحّال

ونصف الأرض ضيق،ونصفها كُرْبَهْ

رفيقي بالدروب اللّي تِغِثْ البال

سَهَرْ عينٍ يسافر بي:واسافر به

كأن الله خلق كل الدروب اطلال

وخلق دمعي سحاب ووجهك التربه

مَلَلْت من الرحيل وسيرة الترحال

وكِرِهْ صدري طعون السيف والحربه

د خيلك وين صبحك ليل همّي طال

تعبت اطرد وراك وما حصل قربه

تغيب ازْوال وتْشوف العيون ازوال

وانا عابر سبيل وما انتهى دربه

أهدّ آمال وابني بالخيال امال

وجسمي كِنْ دود الأرض يَنْخَرْ به

(بِكَيْت) ولاَ لِقَيْت من الهجير اظلال

(ظُمَيْت)وحِلْم شَكّايْ الظُمى شِرْبَه

تِقَطّعني سكاكين الفراق اوصال

هِنَا ضربه :هِنَا ضربه :هنا ضربه

بصدري للمواجع خيل ياخيّال

حواجزها الضلوع اللي تكسّر به

حبيبه مابقى من سالفه تنقال

قضى كلّ الكلام اللي نتاجر به

تعالي ذاب شمعي والغلا القتّال

وانا ذنب الغلا مبطي مجاهر به

تعالي قبل ما كَفّ الزمن تغتال

حبيبك والليالْ السود تَغْدَرْ به

قبل سيل الرمل فوق الجسد ينهال

وتِصِيْر آخر محطات اللقا غُربه