سلام ياقبرٍ سكن فيك غالي

الموت عنَي في زواياك مخفيه

ياقبر كني بعد موته لحالى

ياقبر مهما عشت ماني بناسيه

ياقبر عني علّمه وش جرالي

عن حال مفجوعٍ خذا الموت غاليه

عليه تذرف دمعتي لا طرالي

واخفي صدى ونّات قلبٍ يناديه

باح العزاء والصبر فوق احتمالى

بفراق من روحي من الناس ترجيه

وين انت ياللي بعدك الدار خالي

القلب ما احدٍِ بعد موتك يسليه

يابوي دايم صورتك في خيالي

رحت وتركت اللي خيالك يناجيه

افز واشوفك تبّسم قبالي

لازارني طيفك خيالي يخاويه

من عقب موتك ضاق حالي بحالي

غاب السعد والهم حالي يخاويه

عقبك تكدر كل شيٍ صفالي

حتي الفرح ماتت بموتك معانيه

قررت عقبك و حدتي وانعزالي

القلب من فرقاك يكفيه مافيه

واللي يعزيني بسود الليالي

ان الشرف في سيرتك وانت راعيه

وانك شهيدٍ بإذن رب الجلالي

ومن ساس بيتٍ عالياتٍ مبانيه

اسمك بصرح المجد شامخ وعالي

ويشهد على الحاضر تواريخ ماضيه

يالله يامنشي ثقيل الخيالي

يارب ترحم من كسا الطيب طاريه

اللي علومه مع فعوله جزالي

وثوب الشرف والعز والمجد كاسيه

بحقوق ربه مع حقوق الرجالي

وافي وربي بالجمايل موفّيه

في سيرته جامع حميد الخصالي

مافيه طيب إلا خلقه الولي فيه

بالسيرة البيضاء طريقه عدالي

شيخٍ على العلياء بعيده هقاويه

والله لوان العمر مثل الحلالي

والله لا أخذ باقي العمر واعطيه

لكن قضا المعبود مابه جدالي

دربٍ خلقه الرب والناس تمشيه

الموت حق وكلنا للزوالي

والكون كله في تصاريف واليه

امنت بامرك ياعزيز الجلالي

اللي الى ضاقت على العبد يدعيه