يا حلالي ترى لك بالضماير حشيمه

يا بعد روح روحي بك يزين الكلام

في مداهيل قلبي لك ارسومٍ قديمه

ما محاها زماني لو مضى الف عام

انتي اللي على عرش العواطف مقيمه

حولك الورد واسراب القطا والحَمام

آه يا حبني لك يالكفوف الكريمه

وما ابي من كفوفك غير رَدْ السلام

ما لغيرك بقلبي إهتمامٍ وقيمه

انتي اللي تملكَّتي دروب الهيام

قبل اشوفك وروحي يا الحبيبه يتيمه

وكنت من قبل اعرفك تايهٍ في زحام

ويوم شفتك عرفت انك سعاده مديمه

وانك النور ياعمري وشمس الظلام

آه يا حبني لك حب وافي لشيمه

وليت لي قلب ثاني كان ازيد الغرام