فز قلبي شوق يا مزنٍ سرى بارق سحابه
ما ضماك الا هجير اللي بروحي ما رويته
مر طيف الخيال ولف قلبي واهتنا به
والدجا سدل جناحه وارتخى الليل وسريته
آه يا جرح الغرام اللي خذا القلب وسرابه
والمسافة تنتهي عند المكان اللي بديته
مل صبري من رجاك ونوخت فيني ركابه
وشام لك قلبي وانا لاعطيت شيٍ ما خذيته
اتسلى والتسلي تجرح الهايم حرابه
منتظر ميعاد حلمٍ بالأمل يا ما بنيته
يا عذابي ما سليت اللي يسليني عذابه
كم كسى برد المشاعر بالحنان وكم شكيته
كل ما وداه طاري راح له طاري وجابه
والغلا من عز راسٍ ما لغير الله حنيته
بس يا كبر الفراغ اللي ترك لي في غيابه
احتواني موج عشقٍ فاض بحره واحتويته
ما بقى للكون في عيني من الضيقه رحابه
يا رجا عينٍ خيالك وين ما اناظر لقيته
ضامني منك الهيام اللي ملا صدري عتابه
وجيت من جرحٍ بنارك كل ما يشكي كويته
لا تخلي هايم الأشواق يشكي من صبابه
كل شيٍ يا حبيبي تذكره والا نسيته
وانت من يشبه جمالك يوم خلق الله التشابه
من بنات الحور والا من بنات آدم خذيته