قالت وش اكثر شي يعجبك فيني

قلت بصراحه كل ما فيك جذاب

اسمك ورسمك والشعر والجبيني

وعيونك وصوتك وخدك والاهداب

قالت تبالغ قلت لا صدقيني

ترى وصوفك ما بها شي ينعاب

ما كنك الا الليل للعاشقيني

وما كنك الا الوصل ما بين الأ قراب

كلك على بعضك كذا تعجبيني

وفي كل يومٍ فيك يزداد الاعجاب

وشلون مدري بس ذاشوف عيني

والعين ماتنلام في وصف الاحباب

اجمل من النسرين و الياسميني

واصدق من احساس الوفاء بين الاصحاب

الله وش هالزين يانور عيني

حتى القمر يومك طلعتي معه غاب

وياكثر ما انتي بالغلا تملكيني

وياكثر ما ني في شرايينك انساب

وياكثر ما جمعت لك في يديني

ورد الحنان اللي على وجنتك ذاب

يا شمس عمري يا دفاي وحنيني

جيتك حروف الحب وعيونك كتاب

بلحيل احبك يا رجاوي سنيني

وحبك فتح للعاطفه كل الابواب

احساسي الصادق معك يحتويني

واحساس لغيرك من الحب كذاب

عمر الغرام ان طال بينك وبيني

لا تسأليني يوم عن سر الاعجاب