أبد مابه بعالمنا ظواهر ما وراها اسباب

ولزوم الظاهرة نوصل سببها ثم نعالجها

وسبب ما صابنا واضح و منهو ينكره كذاب

سببه الطائفية و النفوس اللي تأججها

وتفتيت التلاحم في كيان ٍ فرصة الأذناب

تدس بداخله كل السموم اللي تروّجها

وبعد ماالطائفية مزقتنا واستوينااحزاب

مصيبة لا غدينا كلنا نجني نتايجها

وانا واحد ضمن ناس ٍ كثيرة تعبدالوهّاب

ولا للتفرقة بصمة مشينة في مناهجها

ربينا و ديننا واحد وكل المسلمين احباب

وابد ما نلتفت صوب الطوايف او نحاججها

يطاردنا فريق ٍ ما يبي شوف الجميع قراب

مناه بدنيته انه علينا بس يضيجها

و جانا بوقتنا هذا مكشر من رداه انياب

بأجيال ٍ مريضة و (التعصب) هو مخرّجها

(تكفر) من يخالفها و تفتح للجحيم ابواب

وبسم الدين تظلم ما درينا وش حوايجها؟

تبي تفرض أوامرها وتبينا نرتضي و نهاب

تحسْب الفكر هو مثل الكرة كل من يدحرجها

عجيبةاسلامنا حجة برامج زمرة الإرهاب

وهو وبكل أسف أصبح (مشوه) من برامجها

يقولون:التزام والالتزام ينوّر الألباب

يهَدي النفس و يسدد خطاها ما يهيجها

ابسأل الالتزام انك تحز بلا ضمير رقاب

لناس ٍ ما اذنبت توقف بريئة في تفرّجها؟

او انك تزرع الرعب بديارك و الشعب يرتاب؟

و تنهي هالأمان اللي سنين ٍ هو مزاوجها؟

او انك تمنع ديارك تعيد و الفرح ينعاب؟

مظاهر للفرح ماهي فواحش بس تبهرجها

او انك تصبح بفعلك مهرج يسعد الأغراب؟

وكل ديرة عدوة كافرة تصبح مهرجها

او انك تنحر الطفلة الشريفة (بنتك) بترحاب؟

بدل ماانته تعيشها بكرامة ثم تزوّجها؟

تراه اسلامنا نهج اعتدال وكل شي بحساب

وابد لا ما منع في هالحياة اطيب مباهجها

ما بين الدين والدنيا نكون وعمرنا ينساب

دلالة خير يتعب في طريجه من يفارجها

نظل نسعد بدنيانا بكل شي هو حلال ٍطاب

ونعد لآخرتنا كل زين لجل يفرجها

مثال:البنت ما ينفع نذلها في شريعة غاب

ولا ينفع نخليها تمادى في تبرّجها

وكما القرآن ماعمري قريت بهالزمان كتاب

ونفسي اليوم طابت بالشعور اللي يخالجها

وذكر الحق تاج ٍعن حروفي لا حشا ماغاب

ولآخر نبض في قلبي قسم لبقى متوّجها

دعيت الله يغفر لي ذنوبي والله التواب

وانا الجلواح و بشعري رسالة جيت اروّجها

بيبقى دينناالأسمى حقيقة ماحجبها حجاب

مثل هالشمس في كبد السما يبقى توهجها