يا ملهمه روفي لحالي الله القادر يروف

ظلمك لعب في حسبة (الجلواح) و اثقل كاهله

وآخر خبر انك تبيني لا عبرتي ماأشوف

شفتي بشر يقدر يحجْب النور أو يتجاهله؟

ما غيرك احد ٍ يستحق يحكم فؤادي يا الهنوف

وشلون أوصل بك عسل لقياك واصبح ناهله؟

مليت من زود الصبر أسهر واصفق بالكفوف

ظميان من زود الوله وانتي أبد متساهله

ما عدت ابي الدنيا بعد شوفك و صرت اعزف عزوف

لا يا بعد كل القلوب الطاهره و الجاهله

بالمختصر زبدة كلامي شطر من بضعة حروف

(قلبك ثمين و ما حد ٍ غيري ترى يستاهله)

انتي ملاك ٍ بالحسن صنف ٍولا مثله صنوف

لو للحلا في ذا الزمان بلاد صرتي عاهله

حسن ٍزرع في خافق المجنون في ضحكتك خوف

حسن الا منه أمر تخضع كثير جباه له

حسن ٍ الا من صوّب القاسي يخليه العطوف

حسن الا من ذاقه العاني يجيب دواه له

حسن ٍ الا منه عبر مجلس تشوف اهله وقوف

حسن ٍ على جمر الولع تشكي وتصيح افواه له

حسن ٍ وسط زحمة الاوادم شاورو له (طوف طوف)

من خوفهم انه يتأذى يسروّ ممشاه له

حتى القمر لامن طلعتي بالمسا صابه خسوف

يخجل ينافس نورك الفتان هاللي ذاهله

ولا صرتي انتي من نصيب انسان من بين الألوف

من هيبتك يا شيخة الشيخات جبتي الجاه له

يا غاليه كل يوم من عمري وسط بعدك يطوف

(ضايع) وقلبي من لظى الحسره يهل بكاه له

انتي الطموح اللي أنا لوصله شغوف ٍ ثم شغوف

وانتي الطموح اللي يطاردْه الخفوق و تاه له

بالمختصر زبدة كلامي شطر من بضعة حروف

(قلبك ثمين وما حد غيري ترى يستاهله)

المستحيل انك الا منك عبرتي ماأشوف

شفتي بشر يقدر يحجْب النور أو يتجاهله