يا بنت ما شفت بحلاك و دلالك

كلك على بعضك ملاك و رهيبه

شاعر و ابي أكتب قصيد بجمالك

و احتار و انتي بالوصوف العجيبه

شفتك و حسّيت بجنون احتلالك

في قلب ما كل حلوة ٍ تهتني به

في قلب له درب ٍ ولا هو بسالك

صعب و يحب مْن البنات الصعيبه

وانتي كفو بن الخفوق يغدى لك

محلى غرورك زارع ٍ فيك هيبه

شفتك و حرّمت النظر في بدالك

كحل العيون السود ربي حسيبه

و الا القوام اللي أنا منْه هالك

أحلى المفاتن شفتها تعتلي به

و الخد الابيض انت كل الصفا لك

صفاك يمكن يرتكب بي مصيبه

و الشعر الاسود يا فديت انسدالك

خصلاتك لآخر ظهرها قريبه

روعة سوادك أشبه بليل حالك

يا ليتني أبقى معه و اختلي به

أشري و انا كلي حلالك حلالك

محظوظ من صرتي غلاه و نصيبه

شفتك تمنيتك وهمي أنالك

أغلى حبيبه ما بعدها حبيبه

راسي و جبتيه بحلاك و دلالك

و الراس ذا ما كل بنت ٍ تجيبه