يا سامعي لو للأساطير تاريخ

وثق إسم هذا الشهم بالصداره

قدره كما قدر الجبال الشواميخ

وارقى بعد في هيبته وفي وقاره

كان الجساره في زمنا لها شيخ

هذا الملك لاشك شيخ الجساره

كان بتعد لمكرماته تواريخ

كل الحساب اعلن معاك انكساره

اترك زحل اترك بلوتو ومريخ

ذا كوكب المجد العظيم ومناره

وان كان وصفه دوّخ الشعر تدويخ

هو دوّخ الكون بشجاعة قراره

ما قاد شعبه برصاص وصواريخ

قاده بنهج ٍ والتسامح شعاره

هذا حمد منهو يعاديه بيشيخ

و لا قدر يحصد معاه انتصاره

جافيه ما يحتاج لوم ٍ وتوبيخ

لابد يجرع من جفاه المراره

يا سامعي لو للأساطير تاريخ

ما غير ابو سلمان حاز الصداره

هلا جيت بتعابير الوفا لك يا الوفي مختال

هلا بك والد ٍ غالي لزوم لقلبي يبرّه

هلا بك يا شهم فارس تساوي بالمقام رجال

هلا يا اعظم ملك عادل سكن في عيني القرّه

هلا بك ثم هلا بك ثم هلا بك وش كثر تنقال

هلا بك قلتها و ارجع أقول معاود الكرّه

يقولون الزمن يشكي و يندب قلة الأبطال

و انا افخر بك بطل خلى الوطن من حنكته درّه

حمدنا ما يجي حكي و نوايا لا يجي بافعال

حمدنا ما بقى فينا عليل ٍ ما بعد سرّه

حمدنا وش أبحكي في حمدنا حاصد الآمال

حمدنا كم أبحكي عن حمدنا كم و كم مرّه

وش اسمى من طبع حاكم يداري من نوى الغربال

ومنهو يشعل الفتنه يجازي بالعطا شرّه

وش ارقى من فكر قايد كسب من حكمته انذال

يمد يدينه لجاحد تعب بانكاره يضرّه

يمين ٍ تنهمر منها المكارم أشبه بشلال

يسار ٍنزفها غيث العطايا عاشت تدرّه

عطوف ٍ لا لمح حال الفقير وساعده بالحال

شديد ٍ لا بدى رمي الأعادي شدته مرّه

الا من قابل العاني يرده مستريح البال

و الا من قابل الثكلى غمرها من حلو برّه

و الا منه حضن طفله يتيمه به براد ظلال

ينسيها لهب صيف المواجع وان قسى حرّه

و الا منه رفع سيف الجساره به يهز جبال

خبيث الطبع من سود الخفايا ينكشف سرّه

مليك ٍ بالشجاعه في زمانه مضرب الأمثال

حكيم ٍ جمّع نفوس الجميع بنفسه الحرّه

كريم ٍ سيرته صارت من اسباب الكرم موّال

وكل من يعشق العليا حفظه وبالغلا جرّه

عظيم ٍ مجده الفارع أساس لنهضة الأجيال

حليم لطيبته نهج ٍ يتوب القاسي ان مرّه

حبيب ٍ وحد بحب الطوايف للبلاد عيال

وحارب بالعدل ركب لتعصب جهله يجرّه

فلا شيعي ولا سني و لا به تفرقه واهمال

فرض مبدا لرفض الطائفيه بالعزم قرّه

غدت بحريننا بيده أميره حسنها ينهال

جدايلها رضا شعبه عليه وهيبته غرّه

حمد هذا حمد حل لمشاكل مالها حلال

حمد هذا حمد بهرج حياته ما بعد غرّه

حمد هذا حمد غيث القلوب البارق الهمال

حمد هذا حمد عون اليتامى للعلي درّه

من اول ما رقى عرش الزعامه ما نشوف اذلال

غدا هالشعب بحقوقه عزيز ودارنا حرّه

نويتك ياالوفي وانت المليك و بختصار اقوال

تعلى واذهل العالم و ورّه حنكتك ورّه

وخل زيف الردي خلّه يسوق مْن الطعون اشكال

مسيره من كبر قدرك يموت و يندفن حرّه

شموخك يا حمد مثل الجبل عالي ولا ينطال

واحس كل هالقصايد ماانصفت من هالجبل ذرّه