يا غاليه ذا عاشقك ضايق معرّض للضياع

و انتي بعيده عيشته ذل و هواجيس وهموم

شلون ضَيقّتي عليه الحال و عيونك وساع ؟

من نورها غطّت على القمرا ..على كل النجوم

جيتك و كاتب بيت من قلبي و اطلبك السماع

من قلب في حبك و من فرقاك ظامي و امْحروم

ما اقسى غرام محرّقي قلبه تعلّق فالرفاع

بس لجل اشوفك و اسمعك صرت اتعنّى كل يوم

كافحت في رجوى وصالك دوم قدر المستطاع

حاولت لكني شجاع و ما قوى كثرة خصوم

و آخر خصومي للأسف انتي وصلت لأقتناع

البعد اثبات الهوى بيدوم و الا ما يدوم

يوم الحواجز فرّقّت صرتي قنوعه بالوداع

و الا انا ما زلت بك مجنون و علومي علوم

انا على كثر الشقى انسان ما فارق و باع

مهما حصل عندي أمل بكره طموحي في قدوم

لو هاجم اجوائي تعب اقوى على خطة دفاع

لا صدني عنك بشر لجلك انا قلب الهجوم

العشق مره بالعمر و القلب ما يقبل خداع

ما فيه صرح بالحياه يقوم من دون العزوم

تمردي عن واقعك يا عاشقتني للنخاع

عودي على خبري قوية باس لو قلبك رحوم

عودي على خبري بحبي دوم راسك بارتفاع

شديدة عند اللزوم و ناعمه عند اللزوم

تمسكك فيني قبل سبب لهالعالم صداع

قلتي محمد يا ملا في كوم و الدنيا بكوم

كنتي تفوزين بصراع و يبتدي بعده صراع

أطول شديد بقسوته لكن لك الفوز امْحسوم

عودي على خبري وبالصاعين نجزي كل صاع

من عاذل همه طعن ظهر التلاقي بالسهوم

جيتك وكاتب بيت من قلبي و اطلبك السماع

من قلب في حبك و من فرقاك ظامي و امْحروم

ما اقسى غرام محرّقي قلبه تعلّق فالرفاع

بس لجل اشوفك و اسمعك صرت اتعنّى كل يوم