ياطير يا طير ياطير السعد يا للي ترف الجناح
لا واهنيك ليا ضاقت عليك الأرض خليتها
وإن رحت وإن جيت ياطير السعد تسبق هبوب الرياح
وأظن ما فيه ديره فوق وجه الأرض ما جيتها
ما نته بمثلي تجي وتروح ما يصعب عليك المراح
لكن ياليت جنحانك معي ياطير ياليتها
كله على شان ازور اللي رماني بالعنا واستراح
اللي على شانها الاقدام عنتني وعنيتها
في ماض الأيام أشوفه قدم عيني فالمسا والصباح
واليوم حتى العلوم اللي تجيني عنه ما أوحيتها
وليا نشدت العرب ما حدن يعلمني عنه وين راح
وأتعبت نفسي وبالنشدة كثير الناس بذيتها
لا ووجودي على شوفك ولو مره يا ظبي البراح
ياللي على شانك العبره على الخدين هليتها
يا بو عيونٍ هدبها يزرق العشاق زرق الرماح
ذبحت روحي على كفك برمش العين واحييتها