الايالعالم المجهول حدثني عن المجهول

انا احس الحياه اسرار والعالم تعيش ابها

انا اكتب فيك شعري واتسأل وانته المسئول

عن الفكره وشاعرها وقاريها وكاتبها

تعبت اطرح سوالاتي وافكر مالقيت احلول

ماغير اطرح سوالاتي على نفسي واجاوبها

لياقلت الخيال احلى يامر الواقع المعقول

اصدق نظرتي وارجع الي الواقع واكذبها

تضاريس الحياه ارمال واجبال اووعر واسهول

سرحت ابها بامان وخفت يوم اني سريت ابها

مشيت امع الطريق اللى يبذ الرجل عرض وطول

طريقً شاب راسي منه وامثالي مشيبها

طريقً فيه عز النفس يشهر سيفه المسلول

وقال النفس ترضى الذل ماتدرك مطالبها

ليامنك بغيت العز قل للشامخ الغرمول

انا شم الجبال اللي على متنك رقيت ابها

وانا شاعر مشاعر والمشاعر ماعليها اقفول

ليافاضت تسابق ساعة الوقت وعقاربها

تمر اثقل من اللحظه على اللي ينتظر مرسول

لكن اسبق من العبرات يوم انك تحسبها

وقلت ارجوك يكفي لاتزيد الشرح شرح ايطول

انا كل الامور اللي تشير الها مجر ابها

انا سباح بحرٍ فيه من هول القيامه هول

سلاطين المعاني فيه مرسيةً مراكبها

بحر في عمقه الاهوال والفاعل من المفعول

لياحصلت سلامه منه حض اللي يفوز ابها

بحر في عمقه اللؤلؤ على كف الصدف محمول

تجارة رابحه فالبحر جابتني وجيت ابها

سنين اجمع من اللؤلؤ واعد الحول بعد الحول

وصفيته على يمناً بدهن العود اطيبها

ونظمته عقد في جيداً وراه يسبح المجدول

وقدمه مزنةً غرا وبرقً في جوانبها

وفوقه بادياً مبدا القمر مبداً عليه ايحول

شعاع الشمس في يوم امس لحظه قبل مغربها

هذا وصفً تحلابه عشيقة عاشقً مذهول

يعيش ابحبها وايهيم فالارض ويهيم ابها

يجاذبني هواها وايتجاذبها شرف واووصول

شريفه في مذاهبها عريبه في مناسبها

تسال العالم المجهول مثلي والجواب ايقول

لياجاوبتك اول شي بامكانك تجاوبها

وانا اقول الله الباقي وغيره كل شي ايزول

هذا سلم الحياه اللي يعيش ابها يموت ابها