سلام لمحب السلام وخير داعي للسلام

الله يسلم طوره الشامخ ويحفظ هامته

الهامه اللي فوق هامات الملوك إلها إحترام

والقامه اللي ماسواها قامه الاّ قامته

والهيبه اللي ماسواها هيبة تحمي النظام

هيبة ملك هام المخاطر كلها ماهامته

هيبة ملك يحسب لها العالم ويوليها إهتمام

وإيفيق منها عاتي الأحداث من دوامته

قائد وقدوة للشجاعه والمكارم والكرام

بحر ماتلحق له حدود ولا مدى عوامته

شخصية فيها الصرامه والمحبه والوئام

والعدل والرأي الحكيم وحكمته وإحكامته

وعلى الوطن وأهل الوطن جوده مثل وبل الغمام

نو تباشيره تسابق جيته واقدامته

والفضل بعد الله لإبو متعب ودام الفضل دام

ومن لامنا في حب ابو متعب عسى لوامته

تسهب عليه أكبر مجاهيم الشماته والملام

ولايرحم الله جثته بعد تقوم اقيامته

وأطهر ثرى وأغلى ملك وأغلى وطن وارفع مقام

فالدوله اللي مجدها فوق الثريا رامته

الدوله اللي شادها عبدالعزيز ابن الإمام

اللي جمع شمل العرب بقيادته وإمامته

شعشع لنا نور الفرج من شرق يوم الحظ قام

والخير مع عزامته والشر من عزامته

ساد الأمن بأرض الجزيره وإوهتنينا بالمنام

وأهل الفتن من همها مافيه ليل نامته

يالله عسى عبدالعزيز ومن لحق به للرحام

وتحفظ لنا حكامنا اللي كل عدل أقامته

والصف واحد مايجي فينا تشتت وإنقسام

ومن شذ منا دم فاسد تطلعه محجامته

يالله وأنت الله رب الكون والبيت الحرام

نسألك لا تفرح علينا كل قوم شامته

في هالزمن وبكل أسف كثروا مع الناس اللئام

حتى بليس الله يكافينا كثروا خدامته

حلمٍ حلمتوبه ضلاله ياكثيرين الحلام

تفسيره أن القتل حكم الله في حلامته

افكار ملغومه ومسمومه من أخطر سم سام

عنها الفعول معبره لو كان الآلسن صامته

جانا بها اللي سمموا تفكيره اعيال الحرام

خبل العرب لا نابغة وقته ولا علامته

والخبل مايطعم ولايفهم ولايسمع كلام

يسرح ولا نستبعده يضوي بدون إعمامته

حتى على نفسه يوجه بأصبعين الإتهام

ولايشوف العار في وجهه تنادى شامته

لكن حنا ما تزعزنا خفافيش الظلام

حنا عمار الدار يالاشرار يا هدامته

وحنا الرجال اللي بعون الله نضيم ولا نضام

وحنا ملاذ لمن جبابرة السياده ضامته

وحنا الرجال اللي ليا جات المواقف والزحام

دون الوطن كل يبيع الروح يا سوامته

وحنا نخوض الحرب ونطش العمايم فالعسام

يوم العدو يقلط عليها لابس كمامته

والله سريع بالفرج والله شديد الإنتقام

وليا إعترض خد المعادي ياكثر لطامته

وحنا من اولنا ترانا مانعرف الإنهزام

يهزم بنا الجمع الغفير وكلنا هزامته

في رأي ابو متعب نسير إلى التطور والأمام

ولانسير الاّ وراه مع الدروب السامته

والناس تعرف من معادنها مثل حمض العظام

والثوب وهو ثوب تعرف جودته من خامته

وعلى النبي صلوا معي يامن سمع مسك الختام

والله يحفظ سيدي في سفره وإقامته