يا صاحبي وأنت المفارق طالت يدين الدروب
فاضت عيون الجرح تسقي في مسافاتي وله
المشكلة ما هي حنين الشمس لآفاق الغروب
لكن حنين الشرق يا شمس الرحيل المشكلة
علمي بقلبي يوم وجهك في شراييني يجوب
وعلمي بوجهك يوم قلبي تحتويه الأسئلة
إن تبت من طاري الهوى عيت عيونك لا تتوب
من الجمال اللي جبر كسر القصايد بأجمله
يا صاحبي وأقسى الهروب إلى تخيلت الهروب
من الجروح الماضية صوب الجروح المقبلة
من كل صوب ألقاك لين أفارقك من كل صوب
مثل السؤال اللي سئمت أجاوبه قبل أسأله
أنا أسألك باللي خلق للذنب غفران الذنوب
وش يجني اللي باع عمره لأجل عمرٍ يجهله
هذي السنين أوراق تتخطف بقاياها الهبوب
هذي الهبوب اللي تلم أوراق عمري مرحلة
الحلم يا فرحة طفل .. والعمر يا وجه شحوب
والعين غيمة من ضما .. والقلب صحرا قاحلة
شاعر سعودي صاحب حضور مميز في الساحة الشعرية . تأثر بالشاعر الأمير
بدر بن عبدالمحسن وكتب قصيدتة (رسالة الى البدر) لشدة إعجابة بالبدر
له العديد من القصائد المميزة في مجالات الشعر.
