سريت ولا بقى فيني سوى دمعٍ سكبني دمع
على خد الزمان ولا كسر حظه ولا عينه
سريت ووحدتي بعضي وبعضي ما يساوي رُبع
محاصيل الخيال اللي نمَت ما بيني وبينه
مصيبة .. ليه ما نحصد بعد بانت سنابل سبع ؟
ولو للصبر كفٍ ما رمى به منجل سنينه
طبيعي كلنا نحلم وللغربة وطن بالطبع ..
حدوده لهفة العاشق لقلبٍ ما عرف وينه ؟
يحاصرني وأنا أحاصر ظلامٍ ذاب فيه الشمع
بكى من ظلمته طفلٍ كفيفٍ يفرك يدينه !
ملامح وجه في وجهه .. تعلم يستسيغ السمع
على بعض الكلام اللي يجامل به محبينه
خيول أفكار في باله تجول ولا تثير النقع
طوى مضمارها حلمه وتوقيته وتخمينه
روى شوق وضما وصل وسرابه لو تفجّر نبع
نبت في مهجته حرفين وإخضّرت بساتينه
يا أول من سكن صدري وأشوفه من ضلوعي ضلع
يا آخر من هجر قلبي ولا فارق شرايينه
رحلت .. ولا بقى فيني سوى دمعٍ سكبني دمع
على خد الزمان ولا كسر حظه ولا عينه !!
شاعر سعودي صاحب حضور مميز في الساحة الشعرية . تأثر بالشاعر الأمير
بدر بن عبدالمحسن وكتب قصيدتة (رسالة الى البدر) لشدة إعجابة بالبدر
له العديد من القصائد المميزة في مجالات الشعر.
