يا هي سنة .. وفصولها ما هي فصول

صبّت ضماها في عيون المرابع

كنّ الفصول الأربعة فصل مجهول

يعود لي ثاني/ وثالث/ ورابع !

جفّ السراب ولا بقا شي معقول

إلا إني أجلس في مكاني وأتابع

أشرب ضمايه ، من ضمايه ، وأنا أقول:

كذب السراب ولا جفاف المنابع

مثل الورق ناشف وضامي ومبلول

ويجرفني احساسٍ من الروح نابع

شعرٍ يسيل وينكتب لي على طول

كنه يقطر من علوّ الأصابع

الطيش: عاشق يتبع القلب ويزول

والعشق: طايش قلب ويموت تابع

شفني وأنا جايع/ وضامي/ ومشغول

أشوفني فاضي/ وراوي/ وشابع !!

وجه الحياوي من حيا الوجه مغسول

والصدق طبع وكذب الأحباب طابع

يكفيه خوف إن قال: (ماني بمسئول) !

ويكفيه ضعف إنه يثير الزوابع

ساعي بريدٍ لو فقد طرد مرسول

يعيش مستمتع بجمع الطوابع !!