شِفتك وفكّرت في من قام بك حظه

انا أشهد إنه شقي لو ماتقر عينه

وقفت أهوجس أغض الطرف ماغُضه

وش لون أغُضه وانتي دوم تغرينه

بك جاذبيه تحث عاشقك وتحظه

على التمتع بشوفك لا تلومينه

ياسعد من أزهرت بك واثمرت أرضه

يعيش فصل الربيع بْطيلة سْنينه

يقضي حياته مابين أغصانك الغضه

يقطف ورودك ويجني من بساتينه

ملت اسناني من ابهامي واناعضه

ماهو ندم وجد عاشق ماتحسينه

كل المشاعر بحبك دوم مكتظه

ذا عشق يابنت والله ماتعر فينه

واللي بدامنه كـ هو بعض من بعضه

ليتك تحسين به ولا تشوفينه

ياللي ملكتي الجمال بْطوله وعرضه

مقياسه إنتي بغيرك لا تقيسينه

تزهى بجيدك(عقود الماس)والفضه

ويطيح سعرالذهب لوما تلبْسينه

طيفك معي دوم في حلمي وفي اليقظه

وش لون أبنساه واتناساه يازينه

حبك توطن فؤادي صار في نبضه

ساكن مع الدم يجري في شرايينه

ويابخت من له نصيبٍ فيك ياحظه

يكفيه شوفك من هْمومه تسلينه