قلت الغلا: قالت هلا سم لبيه

معها خذتني للامل والاماني

وشعرت كني صايرٍ ياعرب بيه

وش بيه بل سلطان حاكم زماني

وأزريت اجد من فيض الإحساس تشبيه

حيث انّه اكبر من بلاغه بياني

صارحتها: قلت أغبط اللي تحبيه

يابخت منَ لَه وسط قلبك مكاني

قالت وهل :أخفي غرامي وأ خبيه

غيرك فلا يسكن بهالقلب ثاني

قلت اصدقيني القول قالت (ياربيه)

مبروك منّك يوه وش كثر أعاني

انا عطيتك عهد وش لون أخل بيه

واعلنت حبي لك ، لقاصي وداني

قلت آمري وش تطلبينه ألبيه

نذرت عمري في غرام الغواني

قالت طلبتك هاجس الشك مابيه

أشعر واحسْ إنِّه يزلزل كياني

أقول هذا لك ميانه وتنبيه

واللي على قلبي يقوله لساني

قلت اسلمي صبي لي الحكي صبيه

في مسمعي يصبح كلامك أغاني

من غيرك احلم به واحبه وآحابيه

وآ عامله با للطف هو والحناني

تقولين يا لبيه وآقول لبيه

وآ سكِّّنك فالقلب بين المحاني